大阪十天遊 Day 3 : 和歌山

第三日，我地會去和歌山 "黒潮市場" 同搭 "貴志川線列車"

用 Kansai thru pass 在 “大阪難波” 上車搭南海電鐵向和歌山方向 (同去關西空港同一個月台)，“和歌山市” 落車轉巴士去 "黒潮市場"。因為由 "和歌山市" 去 "黒潮市場" 巴士的班次比較疏，走一架車要等差不多 45 分鐘，所以時間都幾緊迫。因為無時間坐底慢慢食早餐，一人買一個麵包上車食 (唔知車廂可唔可以食野呢 ?!)，日本買麵包 .... 好貴 .... 但又真係比香港好食喎。

你睇呆太太食得幾滋味

日本版 tropicana

約一小時後就到達 "和歌山市"，出車站後右邊就係巴士站，搵42號巴士，要寫住去(マリーナシティ)，黒潮市場差不多是尾站，你會見到好大個牌，唔驚唔識落車。

 

去黒潮市場都係為食魚生，價錢唔係好平，但好味道。除魚生外，仲有得 BBQ，我地買了蠔及帶子去 BBQ，師傅會幫你開好晒，只要拎出外面就會有人幫你開爐，咁就可以開始燒喇。

燒蠔

帶子刺身

大大隻帶子，我地一隻燒一隻刺身，yeah !~

哩個台係劏魚用，但好似唔係日日有，我地就睇唔到喇

食飽就去隔離買梅，話就話隔離，其實都係同一個市場入面，哩度有好多梅賣。好似話好出名喎 "紀州梅"，我無乜研究。

食完晏，買完梅，係時候出發去下一個景點喇 "貴志川線"。黒潮市場有巴士出返 JR 和歌山駅，貴志川線個月台比較古怪，要先經 JR 個入口入去 (唔駛買飛，同站長講要去貴志川線佢就會俾你入去)，入到去過隧道，跟指示就會搵到貴志川線月台。同門口個大叔買飛就入得去，一日乘車票 650円 (都幾貴)。

貴志川線一共有 4 款火車行走，分別是いちご電車(士多啤梨電車)、たま電車(Tama電車)、おもちゃ電車(玩具電車)和普通車。車程只係 30 分鐘，但要留意時間，唔同時間會開唔同車，時間表可以睇哩度。由於時間關係，我地只係搭玩具電車。其實哩條貴志川線都幾搵笨，去到只係去睇一睇隻貓站長 Tama，睇完基本上就可以搭返車走，因為附近無乜地方行。

個外型係幾特別，但除此之外就 .... 無喇 ....

佢就係貓站長 Tama

回程先要搭返 "貴志川線" 返 JR 和歌山駅，之後轉巴士返 "和歌山市"，再搭南海電鐵返難波。我地諗住去 "地魚屋台" 食 Dinner，所以返到難波就直接轉車去"天神橋筋六丁目"。哩個地方我地係無意中上網見到人食，睇相又好似好好食喎，所以去試試。但哩個地方都幾偏僻，仲要好衰唔衰我地去到先發現佢 .... 休息。

搭 "谷町線" 到達 "天神橋筋六丁目"

搵 6 號出口，上到地面右轉再左轉就見到喇

無開門 ... 慘

本來諗住在附近搵第樣野食，但哩度實在太偏僻，無乜野好食，最後我地決定返去酒店附近食燒肉，哩間 "昭和大衆ホルモン 宗右衛門町店" 正正對住我地酒店門口，個樣唔係太起眼，但都幾好食，又唔係貴，埋單 2 個人 9,540円。

裡面裝修都幾型

參考資料

黒潮市場
和歌山県和歌山市毛見1527番地
営業時間: 10:00 - 18:00
網址 : http://www.kuroshioichiba.co.jp/

貴志川線
網址 : http://www.wakayama-dentetsu.co.jp/

地魚屋台とっつあん (天六店)
大阪市北區天神橋 7-6-22
營業時間 : 5:30pm - 10:30pm (逢星期一休息)
TEL : (81) 06-6357-4649

昭和大衆ホルモン 宗右衛門町店
大阪府大阪市中央区宗右衛門町4-6 クライスビル　B1F (地庫)
Mon - Sa t: 17:00 - 9:00
Sun : 17:00 - 1:00
TEL : 06-6213-2955

By Roger